RSS

Category Archives: Functions

ஷுபோ மஹாளையா!

மஹாளய அமாவாசை – மிகவும் புனிதமாகக் கருதப்படும் இந்நாள் நம் ஊரில் பித்ருக்களை நினைத்து வணங்குகிறோம். வங்காளத்தில் இன்றுதான் துர்கா பூஜா பந்தல்களில் வைக்கப்படும் துர்கை சிலைகளுக்குக் கண் வரைவார்கள். துர்க்கை சிலை செய்வதற்கான முதல்பிடி மண்ணாக ஒரு விலைமகளின் காலடி மண்ணைத்தான் பயன்படுத்துவார்கள். இதையொட்டி நரசய்யா எழுதிய ஒரு சிறுகதையை விகடனில் படித்த நினைவு. பெயர் நினைவில்லை.

ஃபிலிம் இன்ஸ்டிட்யூட்டில்தான் சேர்வேன் என்று அடம்பிடித்து அம்மாவின் இமோஷனல் ப்ளாக்மெயிலால் தோல்வியடைந்து துளியும் ஆர்வமில்லாத பொறியியல் படிப்பில் பொறியில் சிக்கிய எலிபோல் கல்லூரியில் சிக்கிய நாள். 27.9.2000, an unforgettable day in my life. 11 வருடங்கள் போனதே தெரியவில்லை.

What a coincidence! அன்றும் மஹாளய அமாவாசை 🙂

ஷுபோ மஹாளையா !

 
3 Comments

Posted by on September 27, 2011 in Celebrations, Functions

 

எஸ்.ராமகிருஷ்ணன் நூல் வெளியீட்டு விழா

புத்தாண்டு தினத்தை சற்று வித்தியாசமாக கொண்டாட நினைத்திருந்த என் எண்ணத்தைப் பூர்த்தி செய்தவர் எஸ். ராமகிருஷ்ணன். அவரது நூல் வெளியீட்டு விழா பற்றி அவர் தளத்தில் பார்த்ததுமே போக வேண்டும் என்று தீர்மானித்திருந்தேன். மிஷ்கினால் சர்ச்சைகள் கொண்ட சாரு நிவேதிதாவின் நூல் வெளியீட்டு விழா போலில்லாமல் நிறைவாகவே இருந்தது எஸ்.ராவின் புதிய நாவலான ‘துயில்’ வெளியீட்டு விழா.

சரியாக 6.30க்கு தேவநேய பாவாணர் நூலகத்தை அடைந்தபோது அவ்வளவு கூட்டமாக இல்லை. பதிவர்களில் நர்சிம், அதிஷா, யுவகிருஷ்ணா மற்றும் விஜய மகேந்திரன் ஆகியோரை அடையாளம் கண்டுகொண்டேன். பதிவர் சுரேஷ் கண்ணனை எதிர்பார்த்தேன். தென்படவில்லை. வந்தாரா என்று தெரியவில்லை. சில நிமிடங்களில் அந்தச் சிறிய அரங்கு நிரம்பியிருந்தது. சாருவுக்கு வந்தது போல் கூட்டமில்லை என்றாலும் வந்திருந்தவர் அனைவரும் எஸ்.ராவையும் அவர் எழுத்துகளையும் உண்மையாக நேசிப்பவர்களாகவே இருந்தனர். ஜால்ரா கோஷ்டிகளும், விசிலடிப்பவர்களும் இல்லாமல் நிம்மதியாக இருந்தது.

நிகழ்ச்சியின் சிறப்பு விருந்தினராக இந்திரா பார்த்தசாரதி அழைக்கப் பட்டிருந்தார். மனுஷ்யபுத்திரனின் வரவேற்புரையைத் தொடர்ந்து பேராசிரியர் சித்ரா நாவலைப் பற்றிய அறிமுக உரை வழங்கினார். அவரைத் தொடர்ந்து இயக்குனர்கள் ஜே.டி, ஜெர்ரி, முரளி அப்பாஸ், திரு ஆகியோர் வாழ்த்துரை வழங்கினர். விழாவுக்காக முகஸ்துதி செய்யாமல் உளமார வாழ்தியதுபோல் இருந்தது. இயக்குனர் முரளி, எஸ்.ராவுக்கு சாஹித்ய அகடெமி விருதும், அவர் எழுத்துகள் ஆங்கிலத்தில் மொழிபெயர்க்கப்பட்டு நோபல் பரிசும் கிடைக்க வேண்டும் என்று கொஞ்சம் ஓவராவே பேசினார். பின் சிறப்புரை ஆற்ற வந்த இ.பா, சாஹித்ய அகாதேமி எல்லா ஒரு விருதே இல்லை. மக்கள் ஆதரவை விட சிறந்த ஒரு பரிசு இல்லை என்றார். நாவலைப் பற்றி தமிழும் கொஞ்சம் ஆங்கிலமும் கலந்து பேசினார். புத்தகத்தைப் படிக்காமல் அதைப் பற்றி பேசுவதில்லை என்று குறிப்பிட்டார். அதனால் ஒருவாரம் முன் கொடுக்கப் பட்ட புத்தகத்தை நான்கு நாட்களில் படித்துவிட்டு வந்ததாக சொன்னார். இதை மிஷ்கின் போன்றவர்கள் கற்றுக் கொள்வது நல்லது. இ.பா வின் ‘குருதிப்புனல்’ நாவலைப் படிக்க வேண்டும் என்று நினைத்துக் கொண்டேன்.
அவரைத் தொடர்ந்து ஈரோட்டைச் சேர்ந்த வழக்கறிஞர் ஸ்டாலின் குணசேகரன் பேச வந்தார். ஈரோடு என்றதும் உற்சாகமானேன். ஏனோ தெரியவில்லை அரசியல் மேடையில் பேசுவது போல் ஆவேசமாக பேசினார். எஸ்.ரா புராணம் பாடி அவரை நெளிய வைத்து விட்டார். கேப்டனுக்குப் போட்டியாக  புள்ளி விபரங்களைக் கூறினார். அதில் உருப்படியான இரண்டு இது எஸ்.ராவின் 50-வது நூல். உயிர்மை வெளியிடும் அவரது 27-வது நூல். அரங்கில் சிலர் அவரது நீ…ண்ட பேச்சைப் பொறுக்க முடியாமல் கைதட்டினர். அப்படியாவது அவர் உரையை முடித்துக் கொள்வாரென்று. ஆனால் அவரோ அதைப் பாராட்டு என்று தவறாக புரிந்துகொண்டு பேசிக்கொண்டே இருந்தார். ஒருவழியாக அவர் முடித்தபோது அப்பாடா என்று பலத்த கைதட்டல்கள்.
அதன்பின் ஒரு நிகழ்ச்சியின் இரண்டாம் அமர்வாக வாசகருக்கும் எழுத்தாளருக்கும் இடைவெளியைக் குறைக்க வேண்டும் என்று ஒரு கலந்துரையாடல் நிகழ்ச்சியினை ஏற்பாடு செய்திருந்தார் எஸ்.ரா. இலக்கியம் சார்ந்த சிலருடன் நாவலைப் பற்றி மட்டுமின்றி பொதுவான இலக்கியச் சூழலைப் பற்றிய ஓர் உரையாடல். மனநல மருத்துவர் ருத்ரன், எழுத்தாளர்கள்  யுவன் சந்திரசேகரன் மற்றும் முருகேச பாண்டியனுடன் எஸ்.ரா உரையாடினார். மனுஷ்ய புத்திரன் ஒருங்கிணைத்தார். இதுபோல் வேறெந்த தமிழ்  நூல் வெளியீட்டு விழாவிலும் நடந்ததில்லை என்று குறிப்பிட்டார். மற்ற நூல் வெளியீட்டு விழாக்களும் இதுபோல் அனாவசிய அரசியல்களையும் ஜால்றாக்களையும் தவிர்த்து இருந்தால் ஆரோக்கியமாக இருக்கும்.
நாவல்களின் எண்ணிக்கை முன்பைவிட தற்போது மிகவும் குறைவாக உள்ளதைப் பற்றி ஆதங்கப் பட்டனர். வழக்கமாக நன்றாக பேசும் ருத்ரன் உடல்நிலை சரியில்லாத காரணத்தால் சரியாக பேசவில்லை. ஆனால் பெயரளவில் மட்டுமே நான் கேள்விப் பட்டிருந்த யுவன் சந்திரசேகர் நன்றாகவே பேசினார். ஹாரி போட்டருக்கு இருக்கும் தமிழ் வாசகர்கள் தமிழ் நாவல்களுக்கு இல்லை என்றனர். ஆனால் இளைஞரளிடம் வாசிப்பு ஆர்வமும், எழுதும் ஆர்வமும் நல்ல ரசனையும் இருப்பதாக கூறியவர், நாவல் எழுதுவது மிகவும் எளிது என்று எல்லோரையும் முயற்சிக்கச் சொன்னார். நல்ல எழுத்தாளனைப் பற்றி அவரது எழுத்துகளும் வாசகர்களும் தான் பேச வேண்டும். எஸ்.ரா. தன்னைப் பற்றிப் பெருமையடித்துக் கொள்ளவில்லை. சாருவைப் போலன்றி தன்னடக்கத்தின் மறு உருவமாக தெரிந்தார்
துயில் நாவல் நோயைப் பற்றி, மருத்துவம் பற்றி, நம்பிக்கை பற்றியது என்று குறிப்பிட்டார். அதனால்தான் தன் நாவலை ‘மருத்துவத்தை மக்கள் சேவையாக நினைக்கும் மருத்துவர்களுக்கு’ அர்பணித்துள்ளார். செவ்வியல் தரத்தோடு இருப்பதாக அனைவரும் கூறினர். 350 ரூபாய் நாவலை 300 ரூபாய்க்கு வாங்கி அதில் எஸ்.ராவின் கையெழுத்தைப் பெற்றுக் கொண்டேன். சுஜாதாவிடம் கிடைக்காத அந்த வாய்ப்பு எஸ்.ராவிடம் கிடைத்தது. மனம் வருடும் எழுத்துகளை எழுதும் அவர் கைகளையும் தொட்டுப் பார்த்துக் கொண்டேன் 🙂 நிகழ்ச்சிக்கு எஸ்.ராவின் ரசிகரான என் மாமாவையும் அழைத்துச் சென்றிருந்தேன். புத்தாண்டு தினம் வித்தியாசமாக இருந்தது என்று நன்றி தெரிவித்தார்.
 
2 Comments

Posted by on January 2, 2011 in Books, Functions

 

புதிய ஆண்டின் இனிய துவக்கம்

எஸ்.ராமகிருஷ்ணனின் புதிய நாவலான “துயில்”  நூல் வெளியீடு விழாவிற்குச் சென்றிருந்தேன். வழக்கம்போலன்றி அமைதியாகவும் மன நிறைவோடும் இருந்தது இந்தப்புத்தாண்டு தினம். புத்தாண்டை இனிதாக துவங்கி வைத்த எஸ்.ரா விற்கு மிக்க நன்றி. விழா சிறப்பாக இருந்தது. விழாவைப் பற்றி அடுத்த பதிவில்.


 
Leave a comment

Posted by on January 1, 2011 in Books, Celebrations, Functions

 

8th Chennai International Film Festival

சினிமாவுக்கும் எனக்கும் ஒரு பூர்வ ஜென்ம பந்தம் உள்ளது என்றே எனக்குத் தோன்றும். அந்த அளவுக்கு சினிமா மோகம் உள்ளவன். வெகு நாட்களாகவே திரைப்பட விழாக்களில் கலந்து கொள்ளும் ஆசை இருந்தாலும் இம்முறைதான் வாய்ப்பு கிடைத்தது. சென்ற வருடம் பணிச்சுமையின் காரணமாக எந்த ஒரு நிகழ்ச்சியிலும் கலந்து கொள்ள முடியாமல் போனது. 8வது சென்னை சர்வதேச திரைப்பட விழாவின் விளம்பரத்தை இணையத்தில் பார்த்ததும் நீண்ட நாள் ஆசை நிறைவேறிவிட்டது போல் உணர்ந்தேன். திரைத்துறையினரைப் பார்க்கும் போது ஏதோ என் குடும்ப உறுப்பினரைப் பார்ப்பதுபோல் ஒரு பரவசம் அடைவேன். படங்கள் பார்ப்பதைவிட அங்கு வரும் நடிகர், நடிகையர், இயக்குநர்களைப் பார்க்கவே சென்றேன்.

அலுவலகத்திலிருந்து அவசரமாகக் கிளம்பி மழை காரணமாக ஆட்டோவில் சென்று 6.45-க்கு வண்ண விளக்குகளால் ஜொலி ஜொலித்த உட்லண்ட்ஸ் அடைந்து Delegate Pass கிடைக்கும் Counterக்குச் சென்றால் பூட்டப்பட்டிருந்தது. நாளை வரவும் என்று ஒரு பெரியவர் சொன்னார். ஏமாற்றத்துடன் நின்றிருந்தேன். இவ்வளவு தூரம் வந்துவிட்டோம், குறைந்த பட்சம் சினிமா பிரமுகர்களையாவது பார்த்துவிட்டுச் செல்லாலாம் என்று நின்றிருந்தேன். அப்போது ஒருவர் அருகில் வந்து ‘Pass வேணுமா?’ என்றார். நண்பனுக்காக வாங்கினேன், அவர் வரவில்லை என்றும் 500 ரூபாய் Pass-ஐ 4oo ரூபாய்க்குத் தருவதாக கூறினார். முதலில் சற்று தயங்கினேன். காரணம் அவர் நண்பர் புகைப்படத்துடன் பெயர் எழுதப் பட்டிருந்தது. யாரேனும் கண்டுபிடித்துவிட்டால் மானம் போய்விடும் என்று தயங்கினேன். இவ்வளவு கூட்டத்தில் யாரும் பார்க்க மாட்டார்கள், கழுத்தில் அணிந்திருந்தால் போதுமானது என்று சொல்லி வாங்க வைத்துவிட்டார். அவர் சொன்னது போல் யாரும் கண்டுகொள்ளவில்லை. அரங்கில் நுழைந்து ஓர் ஓரமான இருக்கையில் சென்று அமர்ந்து கொண்டேன். அடுத்த நாள் என் பெயரில் என் புகைப்படத்துடன் ஐநூறு ரூபாய்க்கு ஒரு வாங்கிக் கொள்ள எண்ணினேன்.

அரங்கில் நுழைந்த போது வயலின் கலைஞர் லலிதா நின்றுகொண்டே காபியையும் சாருகேசியையும் தவழ விட்டுக் கொண்டிருந்தார். காதல் ரோஜாவே, ஏதோ ஏதோ ஒன்று, ஆருயிரே என்று முடியும் தருணத்தில் சென்றதால் முழுவதும் கேட்க முடியவில்லை. மேடையின் பின் இருளில் இரு தொகுப்பாளர்களில் விஜய் டிவி ரம்யா மட்டும் மின்னினார். (நல்லவேளை DD இல்லை!)  கோட் அணிந்த ஆண் தொகுப்பாளர் யாராக இருக்குமென்று யோசித்துக் கொண்டிருந்தேன். வெளிச்சத்தில் வந்ததும்தான் தெரிந்தது அது Maddy!தனக்கே உரிய ஸ்டைலில் சிறப்பு விருந்தினர்களை மேடைக்கு அழைத்தார் மாதவன். ஜெர்மன் நாட்டிலிருந்து இருவர் வந்திருந்தனர். மீசையின்றி ஸ்மார்ட்டாக வெள்ளை கோட்டில் நடிகர் சங்கத் தலைவர் சரத்குமார், வெள்ளை கோட் அணிந்து, முகத்தை மறைக்கும்  தொப்பி காண்ணாடியுடன் நடிகர் விக்ரம் (உயரம் சற்று குறைவாகவும் மெலிந்தும் காணப்பட்டார். பெயர் சொல்லாவிட்டால் அடையாளம் தெரிந்திருக்காது), கேரள சர்வதேச திரைப்பட விழா முடித்த கையோடு நடிகர் ஜெயராம், எஸ்.வீ .சேகர் மற்றும் சில உறுப்பினர்கள் மேடையில் இருந்தனர். அனைவரும் தொலைதொடர்பு அமைச்சர் பரிதி இளம்வழுதிக்காக காத்திருந்தனர்.  வழக்கம்போல் அமைச்சர் தாமதமாக வந்ததும் அனைவரும் பேசத் தொடங்கினர்.
சரத்குமாரும் விக்ரமும் நல்ல தமிழும் ஆங்கிலமும் கலந்து பேசினர். எஸ்.வீ சேகர் வந்ததும் அரங்கில் கலகலப்பு கூடியது. அவர் வழக்கமாக சொல்லும் திரைப்பட தயாரிப்பாளர் பற்றிய ஜோக்கை சொன்னார். திரைப்பட விழாக்களின் இன்றைய நிலை குறித்து ஜெயராம் பேசினார். 20 வருடங்களுக்கு முன் தில்லியில் தான் பங்குகொண்ட ஒரு திரைப்பட விழா பற்றி பேசினார். குளிக்காமல் நீண்ட தலைமுடி தாடி வளர்த்தவர்கள் மட்டுமே கலந்து கொண்ட ஐம்பது வயதைக் கடந்தவர்கள் இவரை ஒரு மாதிரி பார்த்ததாகவும் கூறினார். நகைச்சுவைக்காக எதையாவது பேசி இப்படி மாட்டிக் கொள்வார் போலும். மலையாள சேனலில் தன் வீட்டில் வேலை செய்யும் தமிழ்ப்பெண்ணைப் பற்றி சொன்னது போல்! அந்நிலைமை மாறி இப்போது இளைஞர்களே அதிகம் தென்படுகிறனர் என்றார். சாருவின் விழாவில் கேட்டதுபோல் இருந்தது. இவ்விழாவிற்கு கலைஞர் 25 லட்சம் ரூபாய் நிதி கொடுத்ததாக பரிதி இளம்வழுதி கூறினார். சந்தடி சாக்கில் எஸ்.வீ. சேகர் காலையும் வாரினார். இவர் எப்போதும் இதே ஜோக்கையே சொல்கிறார் என்றார். அரங்கில் மக்களுடன் அமர்ந்திருந்த இயக்குனர் ஷங்கரை மேடைக்கு அழைத்தனர். போட்டியில் பங்குபெறும் தமிழ்ப்படங்களைத் தேர்வு செய்யும் நடுவர் குழுவில் சிங்கீதம் சீனிவாச ராவ்,  சாருஹாசன் மற்றும் நடிகை அர்ச்சனா ஆகியோரை அறிமுகம் செய்தனர். அன்று அர்ச்சனா வரவில்லை.
‘களவாணி LC112’ ஓவியாவும் ‘கற்றது தமிழ் ஆனந்தி’ அஞ்சலியும் குத்து விளக்கேற்றி விழாவை ஆரம்பித்தனர். பேசிய அனைவரும் விழாவிற்கு ஏற்பாடு செய்து முன் நின்று நடத்தும் சுஹாசினி மற்றும் ரேவதிக்கு நன்றி கூறினர். ரேவதி மேடையில் தோன்றி மாதவனுக்கும் ரம்யாவுக்கும் நன்றி கூறினார். பின் சினிமா பிரமுகர்கள் அனைவரும் பால்கனிக்குச் சென்றனர். ரோஹிணி, பார்த்திபன், பூர்ணிமா ஜெயராம், லிஸி ப்ரியதர்ஷன், லிங்குசாமி, உமா பத்மநாபன், லக்ஷ்மி (பாஸ் படத்தில் ஆர்யா அம்மா) ஆகியோர் தென்பட்டனர்.  சுஹாசினி தோன்றி அன்றைய திரைப்படமான Soul Kitchen பற்றி பேசினார். விழாவின் Logo Film-ஐ கௌதம் மேனன் இயக்கியதாக கூறினார். விளம்பரங்கள் முடிந்ததும் உடனே படம் ஆரம்பித்து விட்டனர். பிறகுதான் தெரிந்தது அந்த விளம்பரன்களுள் ஒன்றுதான் அந்த லோகோ படம். புது வசந்தம் படத்தில் வரும் வானொலியில் லைஃப்பாய் பாடல் மாதிரி ஆகிவிட்டது. சுமார் 7.45க்கு படம் ஆரம்பித்தது. Balck Comedy Genre-ல் அமைந்த ஒரு படம். Soul Kitchen was not Soul Touching  😦

இப்படி ஒரு விழா நடக்கையில் திரையரங்கைச் சீர் செய்யும் பணியை மேற்கொண்டிருக்கலாம். வெளி அலங்காரம் பார்த்துவிட்டு  உள்ளே சென்றால் திரையும் இருக்கைகளும் பல்லிளித்தன. அரங்கில் ரங்குஸ்கி தொல்லை வேறு! INOX-ல் VIP-க்களுக்காக Red Carpet Screening ஏற்பாடு செய்திருப்பதாக சுஹாசினி சொன்னார். துவக்க விழாவை மட்டுமாவது INOX-ல் ஏற்பாடு செய்திருக்கலாம். சில அயல்நாட்டு முகங்களும் தென்பட்டன. தம் உடல் வாகிற்குப் பொருந்தாத ஆடையணியும் நம் நாட்டுப் பெண்களை விட சுடிதாரில் தென்பட்ட அயல் நாட்டுப் பெண்கள் மிகவும் பாந்தமாக இருந்தனர். முக்கியமாக அவர்கள் துப்பட்டாவை அழகாக அணிந்திருந்தனர். நம் பெண்கள் அதை அணிவதே இல்லை.

படம் பார்க்கும்போது ஒரு விஷயம் தோன்றியது. சர்வதேச திரைப்படங்கள் அரிதாக இருந்த காலக்கட்டத்தில் இதுபோன்ற விழாக்களைக் கொண்டாடினர். அரிதாக கிடைக்கும் வீடியோ காசெட்டுகளை வைத்து சிறிய Projector-ல் திரையிட்டனர். தொழில்நுட்பம் வளர்ந்தவிட்ட இக்காலத்திலும் அதே போன்று சிறிய Projector  வைத்து திரையின் முக்கால்வாசி அளவு மட்டும் திரையிடுவது வேடிக்கையாக இருக்கிறது. இணையத்தில் குவிந்திருக்கும் டாரெண்டுகளின் மூலம் எந்த ஒரு சிறந்த உலகப் படத்தையும் காணும் வாய்ப்புகள் இன்று இருக்கின்றன. விழாவில் பார்ப்பதைவிடத் தரமான பிரிண்ட்களை  நம் மடிக்கணினியில் காணலாம். அதனால் அரங்கில் பார்க்கும்போது ஒருவிதமான Uncomfortable Feeling-ஐத் தவிர்க்க முடியவில்லை. இருந்தாலும் பலபேருடன் ஆங்கிலம் அல்லாத ஓர் அயல் மொழித்திரைப்படத்தைக் காண்பது ஒரு வித்தியாச அனுபவம்தான்.

 
Leave a comment

Posted by on December 15, 2010 in Functions, Movies

 

சாரு நிவேதிதா நூல் வெளியீட்டு விழா – 13.12.2010

Charu’s wife Avantika receives Book from Nalli Kuppuswamy

நான் முதன் முதல் ஒரு புத்தக வெளியீடு விழாவிற்குச் சென்றது என்றால் பதிவர் சரவணா கார்த்திகேயனுடைய (Writer CSK)  “பரத்தை கூற்று” வெளியீட்டு விழாதான். வெளியிட்டவர் சாரு. ஒரு புகழ் வாய்ந்த எழுத்தாளருடையது என்றால் நேற்று காமராஜர் அரங்கில் நடந்த சாருவின் (Notorious?!?!) புத்தக வெளியீட்டு விழாதான். எனக்கு சாரு மேல் நல்ல அபிப்ராயம் இல்லை. அவரது புத்தகங்களைப் படித்ததில்லை. அவரது தளத்தில் மற்றும் மனங்கொத்தி பறவை மட்டுமே அவரைப் படித்திருக்கிறேன். அதனால் எல்லோராலும் பரவலாகச் சொல்லப்படும் ஸீரோ டிகிரியை CSK-யின் விழாவில் வாங்கினேன். மூன்று பக்கங்களுக்கு மேல் படிக்கவில்லை. வீட்டில் யாரும் அதை படித்துவிடக் கூடாதென்று மறைத்து வைத்தேன். எல்லோரும் ஒருமித்து சொல்லும் கருத்து அதை முழுமையாக படிக்க வேண்டும் என்று. அதற்காக அவரது சிறந்த படைப்புகளான ராசலீலாவைப் படித்துவிட்டுப் பிறகு ஸீரோ டிகிரியைத் தொடலாம் என்றிருந்தேன். இந்நிலையில் அவரது ஏழு புத்தகங்கள் வெளியீட்டு விழ பற்றி அவர் விளம்பரப் படுத்தியதைக் கண்டேன். அவரது புதிய நாவலுடைய கருவை CSK-யின் விழாவில் சொன்னார். அது ஒரு காரணமாக இருந்தாலும் முழு முதற் காரணம் நான் மிகவும் மதிக்கும் சமகால எழுத்தாளரான  எஸ்.ராமகிருஷ்ணன் சிறப்புரை ஆற்றுவதாக அறிந்ததே. இரண்டாவது மிஷ்கின். மூன்றாவது பதிவர்கள் பலரைச் சந்திக்கலாம் என்று. அடுத்து மனுஷ்யபுத்திரன். அவரது பேச்சு நீயா நானாவில் அருமையாக இருந்ததென்று என் மாமா கூறியிருந்தார். உயிர்மையை பல இன்னல்களுக்கிடையில் நடத்துகிறார் என்று அறிந்து கொண்டேன். குஷ்பூ முக்கிய காரணம் இல்லை.

வெளியிடப் பட்ட புத்தகங்கள் :
1. தேகம் (நாவல்) – வாதையின் எண்ணற்ற ரகசியங்களைத் திறக்கும் கதை
2. ஷேக்ஸ்பியரின் மின்னஞ்சல் முகவரி – புதிய & தொகுக்கப்படாத சிறுகதைகள்
3. சரசம்-சல்லாபம்-சாமியார் – நித்தியானந்தர் குறித்த குமுதம் ரிப்போர்ட்டர் தொடர்
4. கனவுகளின் நடனம் – சமகால தமிழக, இந்திய, உலக சினிமா குறித்த பார்வைகள்
5. கலையும் காமமும் – விவாதங்கள்
6. மழையா பெய்கிறது – சர்ச்சைகள்
7. கடவுளும் சைத்தானும் – கட்டுரைகள்
ஆறு மணிக்கே என்னால் அலுவலகத்தில் இருந்து கிளம்ப முடிந்ததால் சுமார் ஏழு மணியளவில்தான் அரங்கில் நுழைந்தேன். பெரிய அரங்கம். அந்த அளவு கூட்டம் இல்லை. பின்வரிசையில் அமர்ந்து சுற்றும் முற்றும் பார்த்தேன். தெரிந்த முகங்களே இல்லை. மேடையில் தெரிந்த முகங்கள் சாரு, மிஷ்கின், மதன், மனுஷ்யபுத்திரன் கனிமொழி, தமிழச்சி, எஸ்.ரா. புகைப்படத்தில் மட்டுமே பார்த்திருந்த அவரை முதன்முதலாக நேரில் பார்த்தேன். கொஞ்சம் பருமனாக இருந்தார். அவரை விட பருமனான குஷ்பூவை கண்கள் தேடியலைந்தன. எங்கு தேடியும் தென்படவில்லை. பெருத்த ஏமாற்றம் 😦 எழுத்துச் சித்தர் பாலகுமாரன் வந்திருப்பதாக சொன்னார்கள். அட! காலையில்தான் தேன்கிண்ணம் நிகழ்ச்சியில் அவரைப் பார்த்தோம். இப்போது நேரில் பார்க்கப் போகிறோம் என்று எட்டிப் பார்த்ததில் அவர் வெண்பட்டுத் தலைதான் தெரிந்தது. விசிலடித்து கைதட்டி ஆரவாரித்துக் கொண்டிருந்த திசையை நோக்கினேன். பதிவர் கூட்டம். ஜாக்கி சேகர், அதிஷா, லக்கிலுக் ஆகியோரைத் தெரிந்தது. CSK- வைப் பார்க்கவில்லை. இவ்வளவு கம்மியான கூட்டம் இருக்கிறதே. காமராஜர் அரங்கம் பத்தாமல் வெளியில் பலர் நிற்பார்கள் என்று எஸ்.ரா. சொன்னதாக சாருவின் தளத்தில் படித்ததை எண்ணி உள்ளுக்குள் சிரித்தேன்.
Audience in Charu’s Book Release Function
இருப்பினும் புத்தக வெளியீட்டு விழாவிற்கு சற்று அதிகமான கூட்டம் என்று அனைவரது பேச்சிலிருந்து அறிந்து கொண்டேன். நான் செல்லும் முன் மனுஷ்யபுத்திரன் தன் உரையை முடித்துவிட்டார். அடுத்து நல்லி குப்புசாமி _________ பேசிக்கொண்டிருந்தார் (சமீபத்தில் தி.ஜா.வின் மிஸ்டர் கோடு கோடு கோடு படித்ததன் விளைவு) அதன் பின் எழுத்தாளரும் சட்ட மன்ற உறுப்பினரான ரவிக்குமார் (எனக்கு தெரியாது) சரசம்-சல்லாபம்-சாமியார் பற்றி பேசினார். ஏன் ஏழு புத்தகங்களை வெளியிட்டார் என்று ஒரு காரணம் சொன்னார். இது சங்கீத பருவம், அவ்வரங்கில் அடுத்த வாரத்திலிருந்து ‘சென்னையில் திருவையாறு’ நடக்க விருப்பதால் சங்கீதத்தின் ஏழு ஸ்வரங்களைக் குறிக்கும் விதமாக ஏழு புத்தகங்களை வெளியிடுகிறார் என்று சாருவே எண்ணாத ஒரு மொக்கையைப் போட்டார். மிஷ்கினே அறியாத குறியீடு. சுரேஷ் கண்ணன் அறிந்திருக்கலாம். ரவிக்குமாரை விடவும் சுமாராக நடராசன் பேசினார் (அவர் எங்கள் தூ…..ரத்து உறவினர் என்று இன்று அம்மா சொன்னார்)
Thamizhachi Thangapandiyan Speech

தமிழச்சி தங்கபாண்டியன் – எனக்குப் பிடித்த அழகான தமிழச்சிகளுள் ஒருவர். ஆனால் அவர் பேசி நேற்றுதான் கேட்டேன். தமிழ் மட்டும் அல்ல ஆங்கிலத்திலும் நன்றாக ‘மழையா பெய்கிறது’ பற்றி பேசினார். சாருவின் தளத்தில் வாசகர்களுடைய கேள்வி பதில்கள் புத்தக வடிவில் வந்துள்ளது. சில பகுதிகளை வாசித்துக் காண்பித்தார். A good speech, they say, should be like a mini-skirt, short enough to be interesting, and long enough to cover the essentials என்று சொன்னவர் தன்னுடைய உரையை மினி ஸ்கர்ட் போலின்றி புடவையாக்கிவீட்டார். தமிழச்சி ஆயிற்றே. (ஆனால் சல்வாரில் வந்திருந்தார் என்பது வேறு விஷயம்).

Kanimozhi Speech
அடுத்து பேச வந்த கனிமொழி எந்தப் புத்தகத்தைப் பற்றியும் பேசாமல், பொதுவாக சாருவைப் பற்றியும், அவர்களது நட்பைப் பற்றியும், தமிழ் இலக்கிய சூழல் பற்றியும் பேசினார். தமிழச்சி போல் எந்தவித தயாரிப்புமின்றி பேசியதுபோல் இருந்தது. மீன்குஞ்சுக்கு நீந்தக் கற்றுக்கொடுக்க வேண்டுமா என்ன? தான் அதிகம் சண்டைபோட்ட நண்பர் சாரு என்றும், அவருடன் பல விஷயங்களில் உடன்பாடு இல்லை என்றும் பேசினார். இலக்கியம் குறித்த விழாக்களுக்கு பெரும்பாலும் பார்த்த முகங்களும் வயதானவர்களுமே தென்படுவர். ஆனால் அங்கிருந்த புதிய இளைய முகங்களைப் பார்ப்பது இன்பமாக இருப்பதாக சொன்னார். சாரு அடிக்கடி தன்னை இளைஞன் என்று சொல்லிக் கொள்வது பற்றியும் சொன்னார்.
Speech by Madhan
பேசிய அனைவரும் தனது உரை முடிந்ததும் கிளம்பிக் கொண்டிருந்தனர். கனிமொழி பேசியதும் சாருவும் தமிழச்சியும் அவரை வழியனுப்பப் பொய் விட்டனர். அடுத்து உரையாற்ற வந்த மதன் வந்ததும் பலத்த கரகோஷம். மேடையிலுள்ள அனைவருக்கும் என்று சொல்ல மேடயில் எஸ்.ரா மற்றும் ம.பு தவிர யாரும் இல்லை என்று நகைச்சுவையாக ஆரம்பித்தார். சற்று முன் வரை colourful-ஆக இருந்தது இப்போது இல்லை என்றும் கூறினார். கனவுகளின் நடனம் புத்தகம் பற்றி பேசினார். சாருவின் தைரியமான தில்லான attitude மிகவும் பிடிக்கும் என்று சொல்லி, அதுபோல் எல்லா நேரங்களிலும் இரக்க வேண்டாம் என்று சொன்னார். சாருவிற்கு கதாநாயகனாகம் ஆசையிருப்பதால் எல்லோரிடமும் பகைமையை வளர்த்து முகத்தை சேதப் படுத்திக் கொள்ளவேண்டாம் என்றும் கூறினார். Inception மற்றும் நந்தலாலா பற்றிய சாருவின் விமர்சனம் நன்றாக இருந்ததாகவும், மிஷ்கின் தன் நண்பர் என்பதற்காக அவரது குறைகளைச் சுட்டிக்காட்டாமல் இருக்கக் கூடாது என்றும் சொன்னார்.
Speech by Mysskin

எல்லோரும் ஆவலுடன் எதிர்பார்த்த மிஷ்கின் வந்தார். மிஷ்கின் கனவுகளின் நடனம் பற்றி பேசுவார் என்றெண்ணி இருந்தேன். ஆனால் முக்கிய நூலான தேகம் பற்றி பேசினார். அவர் ஒரு சிறந்த வாசகர் என்று பரவலாக பேசப்படுவதால் இப்புத்தகத்தைப் பற்றி சாரு பேசச் சொல்லியிருப்பார் என நினைத்தேன். ஆனால் அவர் நூலைப் பற்றி பேசாமல் நந்தலாலாவினால் அவர் நொந்தலாலா ஆனா கதையை இருபது நிமிடங்கள் புலம்பித் தீர்த்தார். நந்தலாலாவைப் பலர் காப்பியடித்திருப்பதாகச் சொன்னது அவருக்கு வேதனை அளித்ததாம். ஒரு தந்தையிடம் பிள்ளை கற்றுக் கொள்வதற்குப் பெயர் காப்பியா என்று கேள்வி எழுப்பினார். அவர் குரோசோவாவையும் கிடாநோவையும் மட்டுமே பார்த்து திரைப்படம் கற்றுக் கொண்டாராம். அதனால் அவர்கள் படம் போல் தெரியலாம் என்று மழுப்பினார். சாருவின் நூலைப் பற்றி பேசாமல் இதையே பேசி வெறுப்படையச் செய்தார். என்ன படித்து என்ன புண்ணியம். மேடை நாகரிகம் தெரியவில்லை. CSK நூல் வெளியீட்டு விழாவில் சாரு செய்ததுபோல் சாருவுக்கு மிஷ்கின் செய்துவிட்டார். சாரு எத்தன் என்றால் மிஷ்கின் எத்தனுக்கு எத்தன் என்று நிரூபித்து விட்டார். சரவணகார்த்திகேயன் போல் சாருவும் நினைத்திருப்பார் ‘இவனையும் மதிச்சு கூப்ட்டோமே. எம்புத்திய….”  என்று. சாருவின் நடிப்புத் திறனைப் பற்றியும் கூறினார். அவருக்கு நடிப்பு சுட்டுப் போட்டாலும் வரவில்லையாம். அவர் பல டேக்குகள் வாங்கியதால் யுத்தம் செய் படத்திற்கு நஷ்டமாம். தேகம் பற்றி அவர் சொன்னது: ‘சரோஜா தேவி’ என்ற காமக்கதைகள் இடம்பெறும் புத்தகமே (சத்தியமாக நான் படித்ததில்லை) தேவலாம், வீட்டில் வைத்து படிக்க முடியாது என்று. இதைவிட ஒரு எழுத்தாளரை அவமதிக்க முடியாது. சபை நாகரிகமற்ற இவரது இலக்கிய அறிவை மெச்சிய, படத்தைக் கொண்டாடிய சாருவுக்கு சவுக்கடி. இதுபோல்  எத்தனையோ பேரை சாரு காட்டமாக தாக்கியிருக்கிறார் என்று நினைத்தாலும் முதன் முதலாய் சாரு மீது எனக்கு பரிதாபம் ஏற்பட்டது. நாவலைப் படிக்கும் எண்ணமே போய்விட்டது. மிஷ்கின் மீதிருந்த மதிப்பும் உடைந்து விட்டது.

Speech by S.Ramakrishnan
அடுத்து என்னைப்போல் பலர் ஆவலோடு காத்திருந்த எஸ்.ரா பேரைத் தொகுப்பாளினி சொன்னதும் அரங்கம் முழுக்க கைதட்டல். சாருவே எதிர்பார்த்திருக்க மாட்டார். நிகழ்ச்சியின் Show Stopper அவர்தான். அவரது எழுத்துகள் போல் அவர் குரல் மென்மையாக இல்லை. ஆனால் பேச்சு அப்படியே இருந்தது. வதை பற்றி அவர் பேசியதில் மயங்கித்தான் போனேன். அதனாலேயே முழுவதுமாக புரியவில்லை. ஜி.நாகராஜன் பற்றி அவர் கூறிய சம்பவம் நெகிழச் செய்தது. பாலுணர்வையும் கடவுளையும் பற்றி அருமையாக சொன்னார். இரண்டையுமே நாம் தலைமேல் தூக்கி வைத்துக் கொள்கிறோம் இல்லை, காலில் போட்டு மிதிக்கின்றோம். கமல் சொன்னதுதான் நினைவுக்கு வந்தது. செக்ஸ் போல் பக்தியையும் வீட்டோடு வைத்துக் கொள்ள வேண்டும். எஸ்.ரா பேசிய பின்தான் நாவலை வாங்கப் படிக்கும் எண்ணம் வந்தது.
இறுதியாக சாரு நன்றியுரை ஆற்ற வந்தார். CSK-வின் விழாவில் சாரு உளறிக் கொட்டினார். சரியாக தயார் செய்துகொண்டு வரவில்லை. ஆனால் நேற்று சற்று சுவாரசியமாகவே பேசினார். அவரது பேச்சில் இளமையும் வசீகரமும் ததும்பியது. வந்த அனைவருக்கும் நன்றி சொன்னவர் கடைசிவரை இருந்த தமிழச்சிக்கு நன்றி சொன்னதாக தெரியவில்லை. ஆனால் நிகழ்ச்சியைத் தொகுத்து வழங்கிய சாரதாவுக்குச் சொன்னார். பின் தன் சுயதம்பட்டத்தை ஆரம்பித்துவிட்டார். Economic Times பத்திரிகையில் தனது முழுப்பக்க பேட்டி வந்ததை வெட்டியெடுத்து ஜெராக்ஸ் செய்து கொண்டுவந்ததை மேடையிலிருந்த அனைவருக்கும் வழங்கினார். ஸீரோ டிகிரியை ஆங்கிலத்தில் மொழி பெயர்த்ததும் எல்லோரும் கொண்டாடினர், வாடா இந்தியாவில், கேரளாவில் கொண்டாடுகின்றனர். ஆனால் தமிழ் நாட்டில் யாரும் மதிக்கவில்லை, கண்டுகொள்வதில்லை என்று குற்றம் சாட்டினார். தமிழர்களுக்கு இலக்கிய அறிவு மற்ற மாநிலக்காரர்கள் அளவுக்கு இல்லை என்று தமிழர்கள் முன் சொன்னது மிகுந்த வருத்தத்தை அளித்தது. மணி வரை அவர்குக்காக உட்கார்ந்திருந்த தமிழ் வாசகர்களை அவமானப் படுத்தும் விதமாக இருந்தது. இவ்வளவும் மீறி அங்கு உட்கார வேண்டுமா என்று தோன்றியது. பின் தேள் சாமியார் கதையை நினைத்துக் கொண்டேன். ஒருவழியாக நிகழ்ச்சி முடிந்து வெளியில் வந்து தேகம் நாவல் மட்டும் வாங்கலாம் என்று நினைத்தேன். ஆனால் உயிர்மைக்காகவும், மனுஷ்யபுதிரனுக்காகவும் ஏழு நூல்களையும் வாங்கிகொண்டு புறப்பட்டேன். வெளியில் CSK-வைப் பார்த்தேன். ஊருக்குப் போகும் அவசரத்திலிருந்த அவரிடம் கைகுலுக்கிவிட்டு வீடு வந்தடைந்தேன். பதிவர் சுரேஷ் கண்ணன் வந்திருந்தது வீடு வந்ததும் அவரது buzzஐப் பார்த்து அறிந்தேன். முன்பே தெரிந்திருந்தால் சந்தித்திருப்பேன்.
இது வரை முக்கிய எழுத்தாளர்களின் நூல் வெளியீட்டு விழாவைக் காணாததால் இது சற்று வித்தியாசமான அனுபவமாக இருந்தது. எழுத்துகள் மூலம் மனம் வருடும் எஸ்.ராவின் கைகளைப் பற்றி வருடவேண்டும் போல் இருந்தது. ஆனால் நேரமின்மை காரணமாக பாலகுமாரன் முகத்தைக்கூட பார்க்காமல் வந்துவிட்டேன். தேன்கிண்ணம் மறுஒளிபரப்பில் மீண்டும் பாலகுமாரன். புத்தாண்டன்று நடக்கவிருக்கும் எஸ்.ரா.வின் “துயில்” புத்தக வெளியீட்டு விழாவிற்கு கண்டிப்பாக செல்ல வேண்டும்.
Love him or Hate him, but you can’t Ignore Charu 🙂

படங்கள் உபயம் : http://kaveriganesh.blogspot.com/2010/12/7.html
 
2 Comments

Posted by on December 14, 2010 in Books, Functions